|
Miðvikudagur 21. nóvember 2007
Google nefnir hugbúnað eftir Dalvík
Atli Fannar Bjarkason hjá 24 stundum hefur unnið frétt um mikinn aðdáanda Dalvíkur. Fréttin birtist í blaðinu í dag undir yfirskriftinni Dan hjá Google elskar Dalvík og er eftirfarandi:
Dan Bornstein kom við á Dalvík á ferð sinni um Ísland síðasta sumar. Honum
líkaði vel og hefur nú nefnt hugbúnað í höfuðið á bænum. Bæjarstjórinn býður Dan velkominn aftur til Dalvíkur.
„Við erum mjög stolt af þessu. Mér heyrist á öllu að þetta sé mikilvægt forrit sem þarna er á ferðinni,„ segir Svanfríður Jónasdóttir, bæjarstjóri á Dalvík, en netrisinn Google hefur nefnt nýjan hugbúnað í höfuðið á Dalvík. Hugbúnaðurinn verður hluti af nýju stýrikerfi sem Google þróar fyrir næstu kynslóð farsíma. Hugbúnaðarverkfræðingurinn Dan Bornstein stendur fyrir nafngiftinni, en hann ku hafa mikið dálæti á Dalvík.
Elskar líka Björk
Þrátt fyrir ítrekaðar tilraunir þá höfðu 24 stundir ekki uppi á Bornstein, en samkvæmt heimasíðu hans er hann mikill aðdáandi Bjarkar Guðmundsdóttur. Hann hefur starfað sem hugbúnaðarverkfræðingur hjá Google í tvö ár, en á að baki 19 ár í hugbúnaðarbransanum. Samkvæmt heimildum 24 stunda var Bornstein á Íslandi síðasta sumar í fríi. Tók hann ástfóstri við Dalvík á ferðalagi sínu og gleymdi ekki bænum þegar hann sneri aftur í vinnuna hjá Google. Aðspurð hvort Dan Bornstein verði boðið til Dalvíkur á næstunni hlær Svanfríður dátt. „Nú veit ég ekki hvenær þessi maður hefur verið hér, en við munum svo sannarlega taka vel á móti honum ef hann vill koma„ segir hún.
„Fyrir sveitarfélög er svona, það sem maður getur kallað sjálfbær auglýsing, það sem er eftirsóknarverðast. Að einhverjum þyki svo gott að koma og vera að hann vilji kynna það öllum heiminum. Það er auðvitað frábært fyrir okkur.„
Dalvík og Google Earth
Um nokkurt skeið hefur almenningur haft aðgang að gervihnattamyndum af heiminum í gegnum Google Earth-hugbúnaðinn. Svanfríður segir myndirnar af Dalvík vera sérstaklega skýrar þar. „Það virðist vera að Google hafi sérstakt dálæti á Dalvík,„ segir hún. „Ef þú ferð á Google Earth, þá eru myndirnar af Dalvík og Svarfaðardal sérstaklega góðar - skýrar og fínar. Við virðumst vera í sérstöku ljósi hjá þessu fyrirtæki. Spurning er hvort Dan Bornstein standi að baki þessu.„
|
